നെന്മാറ: നടപടിക്രമങ്ങൾ ലഘൂകരിക്കാൻ സർക്കാർ മുദ്രപത്രങ്ങൾക്ക് ഇ-സ്റ്റാമ്പിംഗ് സംവിധാനം ഏർപ്പെടുത്തി. ഇതോടെ മുദ്രപത്രക്ഷാമം ഒഴിവായി. എന്നാൽ മുഖവിലയ്ക്കുപുറമേ അധികഫീസും പൊതുജനം നൽകണം. നടപടിക്രമങ്ങൾ പൂർത്തിയാക്കി മുദ്രപത്രം പ്രിന്‍റെടുത്തുകിട്ടാൻ അധികസമയവും കാത്തുനിൽക്കണം.
500 രൂപവരെയുള്ള മുദ്രപത്രങ്ങൾക്കു പ്രിന്‍റിംഗ് ചാർജ് ഈടാക്കാൻ പാടില്ല. 501 മുതൽ 1000 രൂപവരെ ആറു രൂപയും 1001 രൂപ മുതൽ ഉള്ളവയ്ക്കു 10 രൂപ നിരക്കിലും പ്രിന്‍റിംഗ് ചാർജ് ഈടാക്കാൻ ഗവ. അംഗീകൃത വെണ്ടർമാർക്ക് അനുമതി നൽകി ഉത്തരവിറങ്ങി. ചില ജില്ലകളിൽ ഇ-സ്റ്റാമ്പ് മുദ്രപത്രങ്ങൾക്കു വെണ്ടർമാർ പ്രിന്‍റിംഗ് ചെലവിനത്തിൽ 50 രൂപ മുതൽ 100 രൂപവരെ ഈടാക്കുന്നു എന്ന പരാതിയെതുടർന്നാണ് നിരക്കു നിശ്ചയിച്ച് ട്രഷറി ഡയറക്ടർ ഉത്തരവിറക്കിയത്. ഇ-സ്റ്റാന്പിംഗ് പദ്ധതിക്കുമുമ്പ് സർക്കാർ അച്ചടിച്ചുനൽകുന്ന മുദ്രപത്രത്തിന് അധികവില നൽകേണ്ടതില്ലായിരുന്നു.
രജിസ്ട്രേഷൻ ഒഴികെയുള്ള ആവശ്യങ്ങൾക്കുള്ള ചെറിയ തുകയുടെ മുദ്രപത്രങ്ങൾ ബ്ലാക്ക് ആൻഡ് വൈറ്റിൽമാത്രമേ ഇനി ലഭിക്കുകയുള്ളൂ. രജിസ്ട്രേഷൻ ആവശ്യമായ മുദ്രപത്രങ്ങൾമാത്രമേ കളറിൽ പ്രിന്‍റ് ചെയ്തുനൽകുകയുള്ളൂ. ഭൂമി രജിസ്ട്രേഷൻ, വില്പനകരാർ എന്നിവയ്ക്ക് ഇരുകക്ഷികളുടെയും പേരും വിലാസവും നിർബന്ധമാക്കി. മുദ്രപത്രം വില്പനസമയം എടുത്തുകളഞ്ഞു. അവധിദിവസമടക്കം ഏതു ദിവസവും മുദ്രപത്രം വെണ്ടർമാരിൽനിന്നു വാങ്ങാൻ കഴിയും.
100 ജിഎസ്എം നിലവാരത്തിലുള്ള കടലാസിൽ ഇങ്ക്ജെറ്റ് പ്രിന്‍റർ ഉപയോഗിച്ചുമാത്രമേ പ്രിന്‍റ് ചെയ്തു നൽകാൻ പാടുള്ളൂ. ലേസർ പ്രിന്‍ററുകളിൽ അക്ഷരങ്ങൾ മാഞ്ഞുപോകാൻ സാധ്യതയുള്ളതിനാലാണ് ഇങ്ക്ജെറ്റ് പ്രിന്‍ററുകൾ നിർബന്ധമാക്കിയത്. അതിൽ വെണ്ടർമാരുടെ പേരും ഒപ്പും സീലും നീലമഷിയിൽമാത്രം രേഖപ്പെടുത്തണമെന്നും നിർദേശമുണ്ട്. പകർപ്പെടുത്തു ദുരുപയോഗം നടത്തുന്നതു തടയാനാണിത്.
ജോജി തോമസ്
